BASATA - 'KUJITOA KWA WASANII KUOGOPA USHINDANI'

BARAZA la Sanaa Tanzania (BASATA) limedai kuwa kujitoa kwa wasanii kushiriki Tuzo za Tanzania Kilimanjaro Muziki ni dalili za kuonesha uoga wa kushindana na kutokubali kushindwa, huku ikiwataka mapromota wajitokeze kuandaa tuzo nyingine zikiwemo ili kuibua ushindani.

Hayo yalisemwa leo na Mkuu wa Matukio Basata Meregesi Ng'oko, alipokua akielezea historia ya tuzo katika kituo cha Star Tv jijini Dar es Salaam, ambapo alisema kuwa kujitoa kwa baadhi ya wasanii kuwania tuzo ni dalili kuwa wasanii hao wanaogopa kushindana na vipaji vipya vinavyojitokeza.

Alisema kuwa BASATA wamepokea barua mbili rasimi za baadhi ya wasanii waliojitoa kwenye tuzo hizo ambapo, ni msanii wa muziki wa kizazi kipya nchini Dully Sykes, pamoja na bendiya Extra Bongo.

Baada ya kupokea barua hizo za kujiondoa kwa wasanii hao kwenye tuzo BASATA, walifanya utafiti ili kujua nini sababu ya wasanii hao kujiondoa katika tuzo hizo ambapo walibaini kuwa wengi hawapendi kushindanishwa.

"Unajua msanii baada ya kuona kundi alilopangiwa hatoweza kushindana nalo ndipo inapokuja hiyo inshu ya kujitoa tena wengine bila hata ya kuandika barua hiyo ni kwa sababu anaogopa kushindwa" alisema Ng'oko.

Vile vile alidai kuwa mapromota wajitokeze kwa wingi kuandaa tuzo nyingine ili kuibua changamoto mbalimbali zitakazosababisha wasanii kupokea tuzo nyingi tofauti tofauti.

Kwa upande wake Meneja wa bia ya Kilimanjaro George Kavishe alisema kuwa tuzo za mwaka huu zimeboreshwa huku zikitoa fursa kwa wananchi kuwapigia kura wasanii wanaowataka kuwania tuzo hizo.

Alisema kuwa bado wanaendelea kukumbwa na changamoto nyingi, huku wakiendelea kuzifanyia kazi ili kureta mabadiliko ya tuzo hizo zionekane bado zinatija. Alitoa mapendekezo kuwa kuwe na tuzo ndogo ndogo ili kuboresha uchaguzi wa tuzo hizo.